УИХ-ын нэгдсэн чуулганаар Монголбанкны Тэргүүн дэд ерөнхийлөгчид нэр дэвшигч Энхболдын Анарыг томилох нууц санал хураалт явуулахад олонх нь дэмжлээ. Өчигдрийн нэгдсэн чуулганаар гишүүд асуулт асууж, үг хэлсний дараа УИХ дахь АН-ын бүлгээс завсарлага авсан. Харин өнөөдөр чуулганы хуралдааны эхэнд АН-ын бүлэг дахин завсарлага хүссэн боловч УИХ-ын дарга завсарлагын хугацааг сунгасангүй. Ингээд санал хураалт явуулахад олонх нь дэмжлээ.
Энхболдын Анар 1984 онд Улаанбаатар хотод төрсөн. 1992-2001 онд Нийслэлийн 10 жилийн 1 дүгээр дунд сургууль, 2001-2004 онд Япон улсын Хакуо ахлах сургууль, 2004-2008 онд Япон улсын Хакуо их сургуулийн бизнесийн удирдлага мэргэжлээр бакалавр зэрэгтэй төгссөн. Улмаар 2007-2008 онд АНУ-ын Индианагийн их сургууль, 2014-2015 онд АНУ-ын Колумбын их сургуульд суралцаж, эдийн засгийн бодлогын удирдлагаар магистрын зэрэг хамгаалсан. Тэрбээр 2011-2013 онд Монголбанкны Гадаад валютын нөөцийн хэлтсийн нөөцийн мэргэжилтэн, 2013-2016 онд Монголбанкны Зайнаас хяналт тавих хэлтсийн хянан шалгагч, 2016-2017 онд Монголбанкны Төлбөр тооцоо, бүртгэлийн газрын захирал, 2017-2026 онд Монголбанкны Төлбөр тооцооны газрын захирлаар, 2026 оноос Монголбанкны Төлбөрийн систем, технологийн газрын захирлаар тус тус ажиллаж байгаа аж.
Э.Анарын хувьд УИХ-ын гишүүдийн асуултад Төв банканд 16 жил ажилласан туршлагадаа үндэслэн Монголбанк үндэсний мөнгөн тэмдэгтийн тогтвортой байдлыг хангах, санхүүгийн зах зээл, банкны тогтолцоог тогтвортой байлгах, эдийн засгийн хөгжилд дэмжлэг үзүүлж ажиллахаа илэрхийлсэн. Мэргэжилтнээс нь эхлээд газрын захирлаар ажиллахдаа гадаад валютын нөөц, банкны хяналт шалгалтын чиглэлд түлхүү ажилласан учраас инфляцийг зорилтот түвшинд хадгалах, үнийн болон санхүүгийн тогтвортой байдлыг хангах, төв банкны засаглалыг бэхжүүлэх, цахим шилжилтийг эрчимжүүлэхэд анхаарна гэлээ. Мөн Төв банкны хараат бус, бие даасан байдлыг сайжруулах нь тун чухал, иргэдийн хүлээлтэд хүргэхийн тулд ипотекийн эрх зүйн орчныг шинэчлэх, олон эх үүсвэрээс, хөрөнгө оруулалт татах, гадаадын банк ажиллахыг дэмжинэ. Зээлийн хүүг багасгахын тулд олон эх үүсвэр бий болгох, зээлийн мэдээллийн сан, харилцагчийн үнэлгээг боловсронгуй болгож, уян хатан бодлого баримталж ажиллахаа илэрхийлсэн.
