НҮБ-ын Хүүхдийн Сан (UNICEF), Олон Улсын Шилжилт Хөдөлгөөний Байгууллага (IOM), Нийслэлийн Бодлогын судалгаа, шинжилгээний төв хамтран 2024 онд Улаанбаатар хотод шилжин ирсэн хүүхдүүдийн нөхцөл байдлыг судалжээ. Судалгаанд 500 өрхийн 961 хүүхэд хамрагдсан бөгөөд өрхийн судалгааг хүүхдүүдийг хамарсан этнографийн судалгаа, бүлгийн ярилцлагаар баяжуулсан байна.

Боловсролын төлөө: Өрхүүдийн Улаанбаатар руу шилжин ирсэн хамгийн түгээмэл шалтгаан нь боловсрол (39.2%), удаах нь ажил эрхлэлт (35.0%) байв. Өөрөөр хэлбэл, шилжилт хөдөлгөөний цаана зөвхөн ажил хайх бус, хүүхдэдээ илүү сайн боловсрол эзэмшүүлэх хүсэл хүчтэй байна.

• 16% - Хүүхдүүдийн 16% нь Улаанбаатарт ганцаараа шилжин ирсэн нь хамгааллын онцгой анхаарал шаардлагатай бүлэг байгааг харуулжээ.
•  96% - Сургууль, цэцэрлэгт хамрагдаж байгаа ч 12.2% нь шилжин ирснээс хойш боловсролд дэвшил гараагүй гэжээ.
• ⚽ 53.9% - Сүүлийн нэг жилд урлаг, спортын дугуйлан, секцэд огт хамрагдаагүй байна.
• 34.9% - Өрхүүд түрээсийн сууцанд, 40.5% нь гэр хороололд амьдарч байгаа нь орон байрны тогтворгүй байдлыг илтгэнэ.
• Сүүлийн 30 гаруй жилийн хугацаанд (1990-2024) нийт 818,652 хүн аймаг, сумдаас Улаанбаатар хот руу шилжин ирсэн нь 2024 оны нийслэлийн нийт хүн амын 48.8 хувьтай дүйнэ.

Хот руу шилжих нь хүүхдэд илүү олон боломж нээж байгаа ч орон байр, сургуульд дасан зохицох, хамгаалал, чөлөөт цаг, сэтгэл зүйн дэмжлэгийн шинэ хэрэгцээг дагуулж байна.

Судалгааны дэлгэрэнгүй үр дүнтэй танилцах бол энд дарна уу.