Санхүүгийн зохицуулах хорооны хоёр гишүүний томилгоо шийдлээ хүлээж байна

2026-09-29

Санхүүгийн зохицуулах хорооны дэд дарга, орон тооны гишүүн Т.Цэрэнбадрал, Н.Хүдэрчулуун нарын бүрэн эрхийн хугацаа 2025 оны нэгдүгээр сарын 31-нд дууссан. Гэвч УИХ-аас тэднийг улираан томилох, эсвэл шинээр томилох эсэх талаар сонсгол хийгдээгүй, шийдвэр гараагүй бараг 2 жил болох нь. СЗХ-ны албан ёсны цахим хуудаснаас харвал Т.Цэрэнбадрал, Н.Хүдэрчулуун нарыг 2020 оны нэгдүгээр сарын 31-нд орон тооны гишүүнээр томилж байжээ. Хуулиар СЗХ-ны дарга, гишүүний бүрэн эрхийн хугацаа таван жил бөгөөд нэг удаа улираан томилж болдог. Бүрэн эрхийн хугацаа дууссан бол үүрэгт ажлаас нь чөлөөлөхөөр мөн заасан байдаг.

⚖️СЗХ нь банк бус санхүүгийн байгууллага, даатгал, үнэт цаас, хадгаламж зээлийн хоршоо, виртуал хөрөнгө зэргийг хариуцсан банкны бус санхүүгийн салбарын гол зохицуулагч байгууллага. Тусгай зөвшөөрөл олгох, түдгэлзүүлэх, хяналт шалгалт хийх зэрэг онцгой эрх, шийдвэр нь иргэдийн зээл, хадгаламж, даатгал, хөрөнгө оруулалтад шууд нөлөөлдөг, УИХ-аас томилогддог чухал институт юм.

⚠️Хороо нь дарга, зургаан гишүүнээс бүрдэж, асуудлаа олонхын саналаар шийдвэрлэдэг. Тиймээс байгууллагын хэвийн ажиллагаа, тогтвортой байдал, удирдлагуудын үүрэг хариуцлагатай холбоотой томилгооны асуудлыг УИХ цаг алдалгүй шийдэх шаардлагатай байна.

Сэтгэгдэл