
National opinion буюу Монголын нийгэм, эдийн засаг, улс төр болон цаг үеийн тулгамдсан асуудлуудаар олон нийтийн санаа бодлыг сар бүр хэмждэг үндэсний санал бодлын барометр судалгаагаар хавар хүүхдээр морь унуулахыг дэмжих үү гэсэн асуултад хариулт авсан байна. Та өвөл, хаврын улиралд хурдан морины уралдаанд хүүхдээр хурдан морь унуулахыг дэмжих үү гэсэн асуултад судалгаанд оролцогчдын 75-аас дээш хувь нь дэмжихгүй гэж хариулжээ. Энэ бол Монголчууд хурдан морийг хүүхдээр унуулдаг түүхэн уламжлалтай ч хаврын хахирган, өвлийн хүйтэн цагт бага насны хүүхдээр хурдан морь унуулахыг дэмждэггүй гэдгийг харуулав.

Хүйсээр нь авч үзвэл эрчүүдийн 29,3 хувь, эмэгтэйчүүдийг 10 хувь нь дэмжинэ гэдгээ илэрхийлжээ. Харин 70-90 хувь огт дэмжихгүй гэсэн байна. Харин байршлаар нь харвал судалгаанд оролцсон Улаанбаатар хотод амьдардаг хүмүүс 77.9 хувь, орон нутгийн иргэдийн 80.3 хувь нь дэмжихгүй гэх хариултыг сонгожээ. Үүнээс харахад орон нутгийн иргэд хавар, өвлийн морин уралдааныг хотынхноос илүү хувиар дэмжихгүй гэсэн хандлагатай байгаа нь анхаарал татаж байна.

Ийм учраас хавар, өвлийн морин уралдааныг уламжлал хэмээн мушгийн гуйвуулж, бага насны хүүхдээр хүйтний улиралд хурдны морь унуулах нь буруу. Харин үүний оронд УИХ болон Засгийн газар хүүхдийн эрхийг хамгаалах асуудалдаа анхаарч ажиллах нь чухал гэдгийг судалгаа харуулав.