Монголбанкны Тэргүүн дэд ерөнхийлөгчид нэр дэвшигчтэй хийх сонсголыг энэ сарын 23-нд зохион байгуулна
Монголбанкны Ерөнхийлөгчөөс Төв банк/Монголбанк/-ны тухай хуулийн 26.3-т заасан шаардлагыг хангасан гэж үзэн Монголбанкны Тэргүүн дэд Ерөнхийлөгчөөр Энхболдын Анарыг томилуулах саналыг 2026 оны 06 дугаар сарын 04-ний өдрийн А-1/482 тоот албан бичгээр өргөн мэдүүлээд байгаа.
УИХ-ын Эдийн засгийн байнгын хорооны хуралдаанаар өнөөдөр /2026.06.09/ Нэр дэвшигчийн сонсголын тов тогтоох, сонсгол даргалагчийг сонгох тухай Байнгын хорооны тогтоолын төслийг баталж, Монголбанкны Тэргүүн дэд ерөнхийлөгчид нэр дэвшигчтэй хийх нэр дэвшигчийн сонсголыг 2026 оны 06 дугаар сарын 23-ны өдөр явуулахаар тогтов. Сонсгол даргалагчаар УИХ-ын гишүүн Болдын Жавхланг томиллоо.
Сонсголд оролцох хүсэлтийг иргэд, олон нийтээс өнөөдрөөс эхлэн нээлттэй хүлээн авч, 2026 оны 06 дугаар сарын 22-ны 17.30 цаг хүртэл бүртгэнэ.
- Санал хүлээн авах шуудан: 14201 Улаанбаатар хот, Сүхбаатар дүүрэг, Жанжин Д.Сүхбаатарын талбай, Төрийн ордон
- Цахим хаяг: shijirmunkh@parliament.mn
Сонсголын бүртгэл, зохион байгуулалтын талаар 95154730 дугаарын утсаар Ажлын албатай холбогдон тодруулах боломжтой гэж Улсын Их Хурлын Хэвлэл мэдээлэл, олон нийттэй харилцах газраас мэдээлэв.
