Хорих анги дахь боловсрол 3 гол ач холбогдолтой: (1) эрх нь хязгаарлагдсан иргэдийн дунд сурч боловсрох эрэлт хэрэгцээ өндөр байдаг, учир нь нийт хүн амтай харьцуулахад тэдний боловсролын түвшин доогуур байдаг. (2) боловсрол сургалтын үйл ажиллагаанд хамрагдсанаар хорих ангийн дэглэмтэй дасан зохицох, сэтгэцийн эрүүл мэнд сайн сайхан байдал дээшлэх, хорих анги дахь туршлага эерэгшихэд нөлөөтэй байдаг. (3) Суллагдсаны дараах үр өгөөж өндөр, тэдний ажил хөдөлмөр эрхлэх боломж тэлж, дахин гэмт хэрэгт холбогдох байдал эрс буурдаг. Хорих анги дахь боловсрол хүнийг бүх талаар хөгжүүлэх зорилготой байх ба албан ба албан бус боловсрол, бичиг үсгийн хөтөлбөр, суурь боловсрол, мэргэжлийн сургалт, шашны болон соёлын арга хэмжээ, бүтээл хийх, биеийн тамир спорт, иргэний боловсрол, номын сангийн үйлчилгээг багтаасан өргөн ойлголт. Уг тайлан нь 1. Эрх нь хязгаарлагдсан өсвөр үе, залуусын сурч боловсрох эрхийн нөхцөл, 2. Эрх нь хязгаарлагдсан насанд хүрэгчдийн сурч боловсрох эрхийн нөхцөл гэсэн 2 чиглэлээр хийгдсэн нөхцөл байдлын үнэлгээг нэгтгэсэн болно.