Ардчилсан сонгуулийн шударга, ил тод, тэгш, өрсөлдөөнтэй байдлыг хангах үндсэн нөхцөл нь сонгуулийн санхүүжилт, тэр дундаа нам, эвсэл болон нэр дэвшигчдэд олгогдож буй хандивын ёс зүйн болон хуульд нийцсэн байдал юм. Монгол Улсад сүүлийн жилүүдэд сонгуулийн зардал нэмэгдэж, түүнийг дагасан хандивын далд нөлөө, ашиг сонирхлын зөрчил, улс төр болон бизнесийн харилцан хамаарал хурцдаж байгаа нь ардчиллын чанарт сөргөөр нөлөөлөх эрсдэлийг бий болгож байна.