Парламентын гишүүний хуулиар тогтоосон үүрэгт үл хамаарах ажил, албан тушаал хавсран гүйцэтгэхийг хориглох зарчим нь төрийн эрх мэдлийг хуваарилах зарчмаас үүдэлтэй. Үүнийг баримтлахын ач холбогдол нь нэгдүгээрт, засгийн газраас хараат хүмүүс парламентад орох боломжийг хаах, хоёрдугаарт, парламентын гишүүд аливаа бизнесийн ашиг сонирхол, эдийн засгийн бүлэглэлийн нөлөөллөөс хамгаалагдсан байх нөхцөлийг бүрдүүлэх, гуравдугаарт, парламентын гишүүдийг аливаа ашиг хөөх, бусдын эрх ашигт үйлчлэх, албан тушаалын эрх мэдлээ хэтрүүлэх, урвуулан ашиглах зэрэг зохисгүй үйлдэл хийхээс сэргийлэхэд оршдог байна.