Генетикийн нөөцтэй холбоотой асуудлын хүрээнд генетик нөөцийг хамгаалах, судлах, ашиглах хүсэлт гаргах, мэдээллийн сан бүрдүүлэх зэрэг асуудлаар бусад орнуудын эрх зүйн зохицуулалтын баримт бичгүүд болон холбогдох мэдээлэлд чанарын шинжилгээ хийлээ. Судалгааны хураангуй хэсэгт сонгогдсон орнуудын Генетик нөөцтэй холбоотой зохицуулалтуудын ижил төстэй болон онцгой талуудыг харьцуулан дурдсан. Мөн Монгол Улсын нэгдэн орсон Олон улсын конвенц, бодлогын баримт бичиг, эрх зүйн орчны талаарх ерөнхий мэдээллүүдийг оруулсан болно. Судалгаанд генетикийн нөөцөөр баялаг хөгжиж буй орнуудын төлөөлөл болгон Кени, Колумб, Вьетнам улсуудыг сонгосон бол өндөр хөгжилтэй генетик нөөцийг ашиглах, хамгаалах тал дээр нарийвчилсан зохицуулалт хийсэн БНХАУ, Австрали, Норвеги, Япон улсуудынг сонгож хууль эрх зүйн зохицуулалтын хүрээнд судлав.