Олон улсын хэмжээнд санхүүгийн зохицуулах тогтолцоог ерөнхийд нь 4 загварт хуваан авч үздэг байна. Судалгаанд эдгээр дөрвөн загварын талаар, загвар тус бүрээс нь санхүүгийн зохицуулах тогтолцоог амжилттай хэрэгжүүлж байгаа 11 орныг төлөөлөл болгон хамруулсан бөгөөд тэдгээрийн давуу болон сул талуудыг авч үзлээ. Үүнд: 1. институцийн уламжлалт загвар: БНХАУ, Мексик, Хонконг; 2. функциональ загвар: Итали болон Франц; 3. хосолсон буюу нэгтгэсэн загвар: Япон, Сингапур, Герман; 4. хосолмол зохицуулалттай загвар: Швейцар, Катар, Испани, Австрали. Судалгаанаас үзэхэд, институцийн уламжлалт буюу “Силос” загвар нь зохицуулагдаж байгаа хуулийн этгээдийн хэлбэрт анхаарах ба тусгай зохицуулагчийг томилдог байна. Санхүүгийн системийн зохицуулалтын энэхүү загварын төлөөлөл болгон Хятад, Мексик, Хонконгийг судалгаанд хамруулав.