Аливаа улсын төсөв гэдэг нь зөвхөн тодорхой хэмжээний хөрөнгийг төрийн мэдэлд хуримтлуулж зарцуулахдаа биш, тухайн улс орны хөгжлийн цаашдын урт хугацааны хөтөлбөр, түүнийг хэрэгжүүлэх гол хэрэгсэл байх ёстой. Энэ үүднээс манай улсын хувьд төсвийг үрэлгэн зардалд биш, бэлэнчлэх сэтгэлгээний нийгэмд биш, тодорхой бүтээн байгуулалт, үйлдвэрлэлд чиглүүлж улс орныхоо хөгжлийн бодлого, тэргүүлэх чиглэлд нийцүүлэх үүднээс төсөв хэлэлцэх чадавхийг сайжруулахад анхаарч, төсвийн үйл явцад гадаад улс орнуудын “сайн” туршлагыг судлан үзэх нь чухал юм. Тус судалгаанд АНУ-ын Холбооны засгийн газрын төсвийн харилцааны эрх зүйн зохицуулалт, төсөв зохиох, хянах, судалгаа дүгнэлт гаргах, батлах процессын талаар авч үзлээ.